جوازة الواد مخيمر ..! بقلم ـ عبد العزيز محمود

جوازة الواد مخيمر ..!

بقلم ـ عبد العزيز محمود

كانت مشكلة كبيرة في العيلة بعد زواج الواد مخيمر قريبنا من البنت سالى الامريكانية في واشنطن!

فالخال هريدي راسه والف سيف ان يسافر فورا الى أمريكا لوضع حد لهذه المهزلة لكن المشكلة ان السفارة الأمريكانية رفضت منحه التأشيرة لاشتباهها في علاقته بالقاعدة!!

والعم جاعود قال انه سيتبرأ من مخيمر مالم يطلق الامريكانية فورا ثم يعود الى الكفر للزواج من بنت خالته "بخاطرهم" كما كان مقررا قبل سفره ، فالخواجات لا هم من توبنا ولا احنا من توبهم!!

والجد فواز قال انه لن يهدأ له بال حتى يطخ مخيمر عيارين في نافوخه بعد ان جلب لهم العار بزواجه من البت الخواجاية التي ضحكت علي عقله وشربته حاجة صفرا!!!

وهكذا اتصلنا نحن شباب العيلة بمخيمر في واشنطن لاحاطته علما بالمصيبة التي طبلت على راسه ورؤوسنا نحن ايضا بعد ان قررت العيلة منعنا من السفر حتى لا نخطف رجلنا الى أمريكا ونكرر عملة مخيمر!!

-والحل يا شباب ؟؟ دا انا كده ح اتحرم من الميراث!!واعيش طول عمري غريب!!!!

-ما فيش قدامك يا مخيمر غير انك تضرب في امريكا صورة اي كلام وتقول انك اتجوزت مصرية!!

وفي اليوم التالي اتصل بنا مخيمر على موبايل الواد سعدون ابن خالنا:

-خلاص يا شباب انا ضربت لي كام صورة اخر حلاوة !! وبكرة ح ابعتهم لكم ع الكفر بالدي اتش ال!!!

-كام صورة ازاي يعني؟؟!! احنا كل اللي عايزينه صورة واحدة!!!

-ما انتو عارفين المصريات وتفكيرهم!! ما فيش ولا واحدة هنا في واشنطن راضية تتصور معايا فاضطريت أفبرك كام صورة كده مع بنات لاتينيات !! والراجل المصوراتي الاهبل عمل لي تشكيلة أختار منها !!! وعشان مافيش وقت ح أبعت لكم الصور توزعوها بمعرفتكم خللينا نخلص!!!

وفي اليوم التالي كانت المصيبة الكبيرة حين استلم الخال هريدي بنفسه الطرد القادم من امريكا وقبل ان يهم بفتحه خطفه من يده الواد برعي ابن خالتنا وفتحه وأخرج منه أول صورة صادفته :

-شفت ياخال ...الواد مخيمر باعت من امريكا صورة فرحه !!! وبيقول ان مراته مصرية مش امريكانية!!!

فتأمل الخال الصورة طويلا وهو في حالة عدم تصديق ثم قال :

-البت شكلها مصري فعلا !! بس مش غريبة ان مناخيرها فطسا ولونها فحمة؟؟؟!!

-ما انت عارف يا خال ان مخيمر بيموت في السُمر من وهوه عيل في اللفة!!!

-يلااا على خيرة الله المهم انها مصرية!!! ربنا يسعدهم أما أروح الجامع أصلي الضهر وأدعي لهم !!

وبعد دقائق دخل الجد فواز وحين لمح طرد الدي اتش ال حاول فتحه لكن برعي كان اسرع منه واخرج له اول صورة صادفته ..

-شفت يا جدي صورة البت اللي اتجوزها مخيمر!!! دي طلعت مصرية أبا عن جد!!! ومن خربتها!!!

-وريني كده يا وله!!! اي والله دي شكلها مصري فعلا وبيضا ومناخيرها عامل زي مناخير خالتك ام اسماعيل الله يرحمها!!!

-شفت يا جدي ازاي انت كنت ح تظلم مخيمر!!!

وبعد نصف ساعة كانت صورة اخرى في يد العم جاعود يتاملها في شك وريبة ...

-عليا الحرام من بيتي دي لا مصرية ولا هم يحزنون!! دي شكلها يا اما سورية يا اما عراقية يا اما فلسطينية!!!

-يا عم جاعود دي مصرية صميمة واسمها باتعة وعايشة في امريكا مع ابوها الحاج الزعبلاوي اللي شغال في السفارة المصرية هوه ومراته وابنه عنتر !!!

-الله اكبر وابوها وعيلتها شغالين في السفارة بتاعتنا كمان!! اللهم صلي ع النبي !! ايه الحلاوة دي ياولاد!! والله يا مخيمر عرفت تنقي بصحيح!!!!

وعلى آخر اليوم كانت بقية الصور قد وزعت على كبار العيلة وكان كل واحد يتأمل الصورة بتاعته طويلا ثم يضعها في جيبه مؤكدا انه سيعلقها في داره في اوضة الضيوف!!!

وبعد يومين زار الخال هريدي العم جاعود فجلسا يحتسيان الشاي في اوضة الضيوف...

-امال الصورة المتعلقة ع الحيطة دي بتاعت مين يا جاعود ؟!!!

-ما هي دي يا هريدي صورة الواد مخيمر والبت باتعة مراته اللي اتجوزها في واشنطن!!!

-ازاي الكلام ده ؟؟ دي باتعة سودة فحمة والبت اللي عندك قمحاوية وشعرها اكرت!!!

فخرج الرجلان مسرعين الى دار الجد فواز لاحاطته علما بالموضوع وحين دخلا اليه في اوضة الضيوف شاهدا صورة اخري لمخيمر معلقة ع الحيطة:

-مين البت دي يا جد اللي متصورة مع مخيمر في الصورة!!!

-دي مراته باتعة يا بهايم اللي اتجوزها في امريكا واللي ابوها شغال في السفارة بتاعتنا مع مراته وابنه عنتر!!

-ايوه يا جد!! بس البت اللي عندك دي بيضا ومناخيرها زي النبقة!! والبت اللي عندي رفيعة وسودة!! والبت اللي عند جاعود قمحاوية وشعرها أكرت !!!

وهنا عقدت العيلة مجلس حرب لتفقد باقي صور فرح مخيمر في امريكا وكانت المفاجاة الثقيلة حين وجدوا في كل صورة عروسا مختلفة لمخيمر فقرر الجميع اهدار دمه والتبرؤ منه وحرمانه من الميراث!!!

ولم يكن امامنا نحن شباب العيلة غير الاتصال بالواد مخيمر في واشنطن لاحاطته علما بالمصيبة الجديدة التي طبلت على راسه فرد علينا بهدوء غريب:

-مفيش مشكلة يا شباب!!! انا ح ابعت لكم صورة جديدة لنج للفرح!!! العروسة فيها مصرية بجد أخدت وشها من على الإنترنت... وح أحط معانا في الصورة جدي الحاج فواز وعمي جاعود والخال هريدي !!!

جريدة المصريون

.

أضحك الله سنك
ورضي عنك وأرضاك أخي الكريم

.

» الخناقة ..!! بقلم ـ عبد العزيز محمود
» ما بعد الجماعات بقلم : د. محمد العبدة
» حصاد الإفك !بقلم:حامد بن عبد الله العلي
» الصحابة ضرورة لا اختيار..بقلم/صلاح بن فتحي هلل
» أبشر يا "شيخ ياسر" بما يسرك ..بقلم الشيخ سعيد عبد العظيم